Fatmire Duraku
Trioleta
Rraqet e fëmijërisë palë në arkë
Abetarja, një kukull e një fletore
Të gjitha t`mbështjella me sharkë
Rraqet e fëmijërisë palë në arkë
Ja krejt në fund është një markë
qëndis kujdesshëm një punëdore
Rraqet e fëmijërisë palë në arkë
Abetarja, një kukull e një fletore
2
Në kapak është gdhendur një zog
Me dorën plot dej të gjyshit plak
Ajo dorë që lidhte kalin nën shtog
Në kapak është gdhendur një zog
Vura rraqet s`zbrita kurrë në log
Ia kujtoja gishtat gjyshit tërë gjak
Në kapak është gdhendur një zog
Me dorën plot dej të gjyshit plak
3
Kjo arkëz prej arre e drurit të zi
Do të jetë këtu pa mua dhe pa ty
Bija jote ta trashëgoi me dashuri
Kjo arkëz prej arre e drurit të zi
Ca lot më rrëshqitën faqes si shi
Ende ta shoh hijen nga punon aty
Kjo arkëz prej arre e drurit të zi
Do të jetë këtu pa mua dhe pa ty
