{"id":50246,"date":"2020-01-25T09:30:36","date_gmt":"2020-01-25T08:30:36","guid":{"rendered":"https:\/\/fjala.info\/?p=50246"},"modified":"2020-01-25T09:45:49","modified_gmt":"2020-01-25T08:45:49","slug":"kongresi-i-lushnjes-qe-shpalli-tiranen-kryeqytet-ne-100-vjetorin-e-tij","status":"publish","type":"post","link":"https:\/\/jehonashqiptare.al\/fjala\/kongresi-i-lushnjes-qe-shpalli-tiranen-kryeqytet-ne-100-vjetorin-e-tij\/","title":{"rendered":"Kongresi i Lushnjes, q\u00eb shpalli Tiran\u00ebn kryeqytet, n\u00eb 100 vjetorin e tij…"},"content":{"rendered":"

Ruben Avxhiu<\/b>, IllyriaPress.com<\/a><\/p>\n

Ishte mbase shum\u00eb simbolike q\u00eb dy personazhe n\u00eb p\u00ebrkujtimin e Kongresit t\u00eb Lushnjes ishin kryetari i Kuvendit t\u00eb sot\u00ebm, Gramoz Ru\u00e7i, ish-ministri i fundit i Brendsh\u00ebm i diktatur\u00ebs komuniste q\u00eb e mbyti p\u00ebr gati gjys\u00ebm shekulli eksperimentin e demokracis\u00eb shqiptare dhe Princi Leka II pasardh\u00ebsi i Mbretit Zog. Ky i fundit ka nj\u00eb rol t\u00eb jasht\u00ebzakonsh\u00ebm ne hedhjen e themeleve t\u00eb shtetit modern shqiptar (thuhet, por m\u00eb keq se sot ishin pun\u00ebt<\/i>), po nga ana tjet\u00ebr duke u shpallur mbret vulosi precedentin e par\u00eb t\u00eb minimalizimit t\u00eb rolit t\u00eb parlamentit shqiptar n\u00eb fatet e kombit.<\/p>\n

K\u00ebto do t\u00eb kishin m\u00eb pak r\u00ebnd\u00ebsi, n\u00ebse nuk do t\u00eb gjendeshim p\u00ebrpara realitetit t\u00eb hidhur q\u00eb n\u00eb 100-vjetorin e parlamentit t\u00eb par\u00eb shqiptar, Shqip\u00ebria vjen pa nj\u00eb parlament normal.<\/p>\n

30 vjet pas r\u00ebnies s\u00eb komunizmit, vendi ende nuk krijon e mban dot nj\u00eb parliament p\u00ebrfaq\u00ebsues e funksionues.<\/p>\n

Shqip\u00ebria e re paskomuniste u modelua si nj\u00eb republik\u00eb parlamentare, po me p\u00ebrjashtim t\u00eb viteve 1991-1992, nuk funksionoi asnj\u00ebher\u00eb si e till\u00eb. Fillimisht ishin parlamentar\u00ebt demokrat\u00eb q\u00eb humb\u00ebn betej\u00ebn me presidentin e fuqish\u00ebm Sali Berisha. Nj\u00eb pjes\u00eb u larguan duke formuar parti t\u00eb tjera. Shumica e atyre q\u00eb mbet\u00ebn u nd\u00ebrruan me t\u00eb tjer\u00eb \u201cme nj\u00eb t\u00eb r\u00ebn\u00eb t\u00eb lapsit\u201d nga udh\u00ebheq\u00ebsi historik i Partis\u00eb Demokratike.<\/p>\n

Deputet\u00ebt socialist\u00eb g\u00ebzuan nj\u00eb lloj pavar\u00ebsie se as presidenti Rexhep Meidani e as kryeministri Fatos Nano nuk vinin dot n\u00ebn kontroll t\u00eb gjitha grupet n\u00eb Partin\u00eb Socialiste. Po viti 1997 n\u00eb vend q\u00eb t\u00eb rikthente besimin te institucionet vet\u00ebm sa uli pritshm\u00ebrit\u00eb p\u00ebr to. P\u00ebr opozit\u00ebn e re ai ishte thjesht \u201cparlamenti i kallash\u00ebve\u201d.<\/p>\n

N\u00eb fund t\u00eb dekad\u00ebs s\u00eb par\u00eb t\u00eb demokracis\u00eb dhe fillimin e dekad\u00ebs s\u00eb dyt\u00eb, pushteti real kaloi p\u00ebrfundimisht nga presidenca te qeveria, por parlamenti nuk rifitoi dot dinjitetin e humbur. Sa m\u00eb shum\u00eb fuqizohej proporcionali n\u00eb sistemin zgjedhor aq m\u00eb shum\u00eb deputet\u00ebt b\u00ebheshin p\u00ebrfaq\u00ebsues t\u00eb kryetar\u00ebve t\u00eb partive sesa t\u00eb popullit n\u00eb em\u00ebr t\u00eb t\u00eb cilit zinin vend n\u00eb karriget e legjislativit.<\/p>\n

Socialist\u00ebt gjet\u00ebn m\u00eb n\u00eb fund te Edi Rama, versionin e tyre t\u00eb kryepartiakut t\u00eb fort\u00eb q\u00eb i kthen deputet\u00ebt n\u00eb ushtar\u00eb t\u00eb bindur.
\nLigjet n\u00eb let\u00ebr ua l\u00ebn\u00eb deputet\u00ebve fuqin\u00eb p\u00ebr t\u00eb caktuar e rr\u00ebzuar kryeministrin e vendit. Mir\u00ebpo, 30 vjet pas r\u00ebnies s\u00eb komunizmit, n\u00eb Shqip\u00ebri vazhdon t\u00eb ket\u00eb m\u00eb shum\u00eb fuqi urdh\u00ebri politik e partiak sesa ligji n\u00eb let\u00ebr.<\/p>\n

Kryeparlamentar\u00eb si Jozefina Topalli dhe Ilir Meta kishin ambicje personale dhe u p\u00ebrpoq\u00ebn n\u00eb m\u00ebnyrat e tyre q\u00eb t\u00eb forconin rolin e Kuvendit. Po as ata nuk shkuan aq sa t\u00eb p\u00ebrplaseshin hapur me kryeministrin e koh\u00ebs, Sali Berisha.<\/p>\n

Sikur t\u00eb mos mjaftonte imponimi dhe injorimi nga \u00e7do qeveri n\u00eb pushtet, Kuvendi tani sabotohet edhe nga opozita e \u00e7do ngjyre. Duke praktikuar bojkotim t\u00eb institucionit, socialist\u00ebt dhe pastaj demokrat\u00ebt kan\u00eb protestuar me \u00e7adra e greva urie duke e l\u00ebn\u00eb legjislativin si kopsht lodrash p\u00ebr partin\u00eb fituese t\u00eb radh\u00ebs.<\/p>\n

S\u00eb fundi, opozita e sotme ka djegur fare mandatet, nj\u00eb veprim i paprecedent\u00eb n\u00eb bot\u00ebn demokratike, duke p\u00ebrfshir\u00eb edhe vendet shum\u00eb m\u00eb autokratike se Shqip\u00ebria.<\/p>\n

N\u00eb vend q\u00eb t\u00eb korrigjonte gabimin si e k\u00ebshilluan, pa asnj\u00eb p\u00ebrjashtim, t\u00eb gjith\u00eb miqt\u00eb dhe aleat\u00ebt e qendr\u00ebs s\u00eb djatht\u00eb, n\u00eb bot\u00eb, ajo e thelloi kriz\u00ebn duke bojkotuar edhe pushtetin lokal duke i dhuruar pushtet absolut kryeministrit Edi Rama.<\/p>\n

N\u00eb vend q\u00eb t\u00eb negocionte p\u00ebr t\u00eb shmangur kriz\u00ebn e papar\u00eb, Rama e partia e tij e mir\u00ebpriti at\u00eb dhe mund t\u00eb ken\u00eb p\u00ebrdorur korrupsionin apo k\u00ebrc\u00ebnime q\u00eb disa an\u00ebtar\u00eb n\u00eb list\u00ebn e opozit\u00ebs t\u00eb merrnin vendet e l\u00ebna bosh nga koleg\u00ebt e tyre. K\u00ebto vende n\u00eb fund t\u00eb fundit u takonin me ligj dhe shum\u00eb prej tyre b\u00ebn\u00eb detyr\u00ebn q\u00eb u takonte. Po Kuvendi ka ende plot vende bosh, t\u00eb paplot\u00ebsuara dhe nuk e ka m\u00eb legjitimitetin q\u00eb pretendon se ka.<\/p>\n

N\u00eb k\u00ebto kushte, Shqip\u00ebria meriton zgjedhje t\u00eb reja. Nj\u00eb parlament me nj\u00eb mandat t\u00eb ri nga populli. Po nuk ka asgj\u00eb n\u00eb horizont. Rama mbase nuk sheh ndonj\u00eb problem q\u00eb demokracia ka pushuar s\u00eb funksionuari sa koh\u00eb q\u00eb ai vet\u00eb g\u00ebzon pushtet absolut. Kurse opozita preferon m\u00eb mir\u00eb t\u00eb mbetet n\u00eb rrug\u00eb sesa t\u00eb rrezikoj\u00eb nj\u00eb humbje tjet\u00ebr, nga manipulimet e qeveris\u00eb n\u00eb pushtet. Ka arsye p\u00ebr t\u00eb besuar se populli \u00ebsht\u00eb gati ta rr\u00ebzoj\u00eb qeverin\u00eb me vota, por jo me protesta. Po opozita refuzon t\u00eb shkoj\u00eb n\u00eb zgjedhje me Ram\u00ebn kryeminist\u00ebr nd\u00ebrkoh\u00eb q\u00eb ka braktisur t\u00eb vetmin mekaniz\u00ebm ligjor q\u00eb mund ta rr\u00ebzoj\u00eb Ram\u00ebn para zgjedhjeve: parlamentin.<\/p>\n

100 vjet pas Kongresit t\u00eb Lushnjes dhe fillimeve t\u00eb para parlamentare shqiptare, t\u00eb duket se nuk kemi m\u00ebsuar ndonj\u00eb gj\u00eb t\u00eb madhe. Jemi t\u00eb fiksuar me udh\u00ebheq\u00ebs t\u00eb fuqish\u00ebm e t\u00eb pagabuesh\u00ebm. Parlamentar\u00ebt shkojn\u00eb e vijn\u00eb dhe jan\u00eb thjesht taborr\u00eb t\u00eb z\u00ebvend\u00ebsuesh\u00ebm. Mbase shekulli i dyt\u00eb do t\u00eb sjell\u00eb nj\u00eb p\u00ebrvoj\u00eb m\u00eb t\u00eb mir\u00eb. N\u00eb mos, si duken gjasat, nuk e l\u00ebm\u00eb fare k\u00ebt\u00eb ekperimentin e lodhsh\u00ebm q\u00eb e quajn\u00eb demokraci.<\/p>\n

\n

Himi i Kongresit t\u00eb Lushnj\u00ebs<\/strong>:
\n